Prishtina dhe Llapi ka qenë kryendeshja e xhiros së katërt të edicionit të ri të Albi Mall Superligës së Kosovës në Futboll.
Në duelin përmbyllës të ditës së sotme në Superligë, Prishtina ka regjistruar një fitore të madhe me përmbysje ndaj Llapit.
E krejt ky duel nuk ka shpëtuar qetë, ku në fund të ndeshjes janë shfaqur tensione nga skuadra humbëse e këtij dueli, ajo e Llapit, shkruan Sinjali Sporti.
Sinjalizues të Sinjalit kanë dërguar disa pamje nga fundi i ndeshjes, ku kryetrajneri i Llapit, Tahir Batatina shihet tejet i frustruar me gjykimin e sfidës.
Ai madje u ndëshkua me karton të kuq si dhe tentoi t’iu vërsulej gjyqtarit kryesor, Genc Nuza, vetëm për t’u ndalur më pas nga sigurimi.
Prishtina e fitoi 3-2 ndeshjen e sotme, me mysafirët që fillimisht zhbllokuan sfidën përmes Ahmed Januzit në minutën e 34-të, për t’u barazuar rezultati krejt në fund të pjesës së parë nga Leonat Vitija, në kohën shtesë.
E pjesa e dytë prodhoi tre gola, ku fillimisht Llapi kaloi në epërsi për herë të dytë, këtë herë përmes Ilir Blakçorit në minutën e 55-të.
Kryeqytetasit arritën sërish t’i barazojnë shifrat, përmes sulmuesit Albin Krasniqi, i cili realizoi një gol të bukur në minutën e 69-të.
E goli fitues dhe i përmbysjes së rezultatit erdhi në minutën e 77-të, kur Yoan Marc-Oliver tundi rrjetën e Llapit për herë të tretë.
Me këtë fitore, pas tre ndeshjeve të luajtura, Prishtina regjistron fitoren e dytë, krahas një barazimi, duke mbledhur 7 pikë dhe pozicionuar aktualisht në pozitën e dytë.
Llapi ndërkohë regjistron humbjen e dytë në katër ndeshje të zhvilluara, me një fitore dhe një barazim tjetër, duke u pozicionuar në vendin e 6-të me katër pikë.
