Presidentja e Kosovës, Vjosa Osmani ka kritikuar BE-në për qasje jo neutrale në dialogun Kosovë – Serbi.
Në forumin global të sigurisë “GLOBSEC 24”, Osmani ka thënë se lista e marrëveshjeve që nuk zbatohen nga Serbia në kuadër të dialogut është shumë e gjatë ndërsa Kosova e cila ka përmbushur gjithë detyrat e veta prapë është nën masa të BE-së.
“Pavarësisht të gjithë kësaj dhe listës së moszbatimit nga Serbia, gjeni cila palë është nën masa të BE. Është pala që është 100% në linjë me BE-në, pala që asnjëherë nuk merr armë nga Rusia, Kina apo Irani, është pala që 95% e popullit të së cilës janë në favor të BE-së, pala që kurrë nuk ka kryer akt agresioni ndaj fqinjëve të saj, që nuk destabilizon fqinjët, kjo është pala që është nën masa, Kosova. Prandaj tavolina është përmbys. Kur nuk ke barazi qysh në themel të çfarëdo procesi negociues, askush nuk duhet të ëndërrojë për rezultate të prekshme që edhe mund të zbatohen në terren”, ka deklaruar Osmani.
Sipas Osmanit, Serbia në vend që të largojë strukturat serbe ilegale i ka fuqizuar ato duke i kthyer “në banda mafioze”.
“Nëse shohim listën e zotimeve që Serbia nuk i ka përmbushur… është shumë shumë e gjatë, do të na duhej deri nesër që ta lexonim. Është e lehtë ta konfirmoni, mos besoni interpretimin tim. Zgjidhni cilëndo marrëveshje, qoftë marrëveshja për lëvizje të lirë, marrëveshjen për njohjen e diplomave, njohjen e dokumenteve të tjera e të tjera, asnjëra nuk janë zbatuar, as ajo që obligon Serbinë që t’i largojë strukturat paralele ilegale nga Kosova, por fillimisht në veri. Por çfarë ka ndodhur është se në vend të heqjes së tyre, Serbia i ka forcuar vazhdimisht në atë masë sa këto struktura ilegale janë kthyer në banda mafie dhe janë kthyer në rrezikun më të madh për serbët e veriut”, ka theksuar Osmani.