Miley Cyrus është bërë ylli më i ri që ka marrë statusin e Legjendës së Disney-t. Këngëtarja u bë e famshme duke luajtur rolin e Hannah Montanas në serinë e ‘Disney Channel’ që u shfaq për herë të parë në vitin 2006, kur ajo ishte vetëm 13 vjeç.
Në një fjalim emocionues, Miley tha se “ende është krenare që ka qenë Hannah Montana”. Ajo fitoi Grammy-n e parë më herët këtë vit për këngën “Flowers”, e cila u shpall si ‘Regjistrimi më i mirë i vitit 2023’ dhe qëndroi 10 javë në vendin e parë në Mbretërinë e Bashkuar.
31-vjeçarja mori një duartrokitje të gjatë nga publiku prej 12,000 njerëzish kur mori çmimin e saj në ‘Honda Centre’ në Anaheim, Kaliforni, shtëpia e Disneyland-it. Ajo u tha të pranishmëve se “një pjesë e vogël e gjithçkaje ka ndryshuar” që nga roli i saj i parë si adoleshente që jetonte një jetë të dyfishtë si yll popi, “por në të njëjtën kohë asgjë nuk ka ndryshuar fare”.
Miley hyri në skenë ndërsa këngëtarja e muzikës country Lainey Wilson këndoi një nga këngët më të njohura të Hannah Montanas, “The Best of Both Worlds”. Ajo u përlot teksa tregonte për performancën e saj të parë si Hannah.
“Na duhej pamje e saj duke performuar në koncerte që biletat të shiteshin plotësisht, por askush nuk e dinte se kush ishte ajo, pra Miley,” tha ajo. Biletat u shpërndanë falas në një qendër tregtare, ku Miley dha koncertin e saj të parë pa pagesë. “Në realitet isha një vajzë e vogël me një paruke bionde në qendër tregtare me një ëndërr të madhe. Por në zemrën time isha Hannah Montana dhe isha shumë krenare që isha,” tha ajo.
Miley bëri shaka duke thënë se “me siguri nuk u krijova në një laborator,” duke iu referuar thashethemeve se fëmijët e Disney-t krijohen në zyrat e Disney-t në Kaliforni.