Është zbuluar se artisti i njohur kanadez, Drake, u bë shpëtimtari i Venezias sezonin e kaluar, duke ndihmuar klubin të mbledhë rreth 40 milionë euro, çka ndihmoi në shpëtimin e tyre nga falimentimi.
Venezia kaloi sezonin 2021-22 në kategorinë më të lartë të futbollit italian, hera e parë në Serie A pas 20 vjetësh. Megjithatë, në përpjekje për të qëndruar në ligën e parë, klubi mori borxhe të mëdha, duke shpenzuar rreth 20 milionë euro për tarifa transferimi në fillim të atij sezoni.
Në fund, Venezia u rikthye në Serie B në pranverën e vitit 2022, ku qëndroi për dy sezone të tjera, përpara se të fitonte përsëri promovimin në kategorinë e parë përmes play-off-eve në fillim të qershorit.
Është zbuluar se Venezia kishte nevojë për një injeksion të menjëhershëm prej 10 milionë eurosh për të mbajtur klubin në këmbë sezonin e kaluar. Gjithashtu, kërkoheshin 30 milionë euro të tjera për të mbajtur klubin funksional në të ardhmen.
Matte Babel, i cili është shefi i markës së Drake, shpjegoi për GQ Italia se si erdhi ky partneritet i papritur.
Njohja e Babel me Brad Katsuyama, një kanadez tjetër dhe investitor në Venezia, sigurisht që ishte e dobishme.
“Pata një telefonatë nga Brad, bashkëpronar i Venezias dhe një mik i mirë i imi,” tha Babel për GQ Italia.
“Ai ma shpjegoi problemin në mënyrë të thjeshtë: Venezia duhet të mbledhë 10 milionë euro brenda disa javëve, dhe pastaj të paktën 30 milionë euro brenda disa muajve, ose klubi do të falimentojë.
“Venezia është një qytet i jashtëzakonshëm, dhe Venezia gjithmonë ka qenë një klub special. Fola me Drake, pastaj unë dhe Brad diskutuam detajet se si mund të ndihmonim. Brenda dy javësh, arritëm një marrëveshje dhe mblodhëm paratë e nevojshme për të paguar pagat dhe për të shmangur falimentimin.”