Shumica e amerikanëve kanë dyshime për aftësinë e Shërbimit Sekret për t’i mbajtur të sigurt kandidatët presidencialë pas përpjekjes së muajit të kaluar për të vrarë ish-presidentin Donald Trump.
Këtë e vuri në dukje një sondazh i ri nga Associated Press-NORC Center for Public Affairs Research.
Vetëm rreth 3 në 10 amerikanë janë jashtëzakonisht ose shumë të sigurt se Shërbimi Sekret mund t’i mbajë kandidatët presidencialë të sigurt nga dhuna para zgjedhjeve, sipas sondazhit.
Sondazhi zbuloi gjithashtu se rreth 7 në 10 amerikanë mendojnë se Shërbimi Sekret mban të paktën një sasi të moderuar përgjegjësie për atentatin.
Sondazhi u krye pas dorëheqjes së drejtoreshës së Shërbimit Sekret Kimberly Cheatle, e cila u përball me pyetje intensive në një seancë dëgjimore në Kongres që u transmetua drejtpërdrejt javën e kaluar dhe në të cilën ajo dha përgjigje evazive.
Drejtori i ri ushtrues i detyrës Ronald Rowe tha në fillim të kësaj jave se i vinte “turp” pas sulmit të 13 korrikut në Butler, Pensilvani, ndërsa tha se e konsideronte të pambrojtur çatinë e përdorur nga personi i armatosur.
Gjatë një konference shtypi të premten, Rowe pranoi humbjen e besimit të agjencisë nga populli amerikan.
Ai tha se njerëzit në përgjithësi dinë vetëm për dështimet e agjencisë – jo sukseset e saj.
Row vlerësoi stafin e agjencisë që në heshtje “punon në sfond” për të mbrojtur mitingjet politike, ditën e inaugurimit dhe ngjarje të tjera.
“Ne do ta fitojmë besimin tuaj”, u zotua ai, raporton AP.
Sondazhi zbuloi se amerikanët kishin më shumë gjasa të thoshin se ndarja politike në ShBA kishte “një pjesë të madhe” të përgjegjësisë për atentatin.