Shkenca mund të ketë zbuluar një lidhje mes rrezikut të autizmit te fëmijët dhe acidit yndyror në gjakun që ndodhet në kordonin umbilikal.
Për të hedhur dritë mbi shkaqet e autizmit, studiuesit nga Universiteti Fukui në Japoni kanë analizuar lidhjen mes acidit yndyror të pasaturuar (PUFA) që gjendet në mostrat e gjakut të kordonit umbilikal dhe rezultatet e autizmit te 200 fëmijë. Ata besojnë se kjo gjetje e re mund të jetë shumë domethënëse për të kuptuar, diagnostikuar si dhe parandaluar çrregullimet e spektrit të autizimt (ASD).
Studimi identifikoi një komponim të veçantë në acidin e gjakut të kordonit umbilikal, i cili quhet diHETrE e që mund të ketë implikime të forta në llojet e ASD-së.
“Niveli i diHERTeE-së në gjakun e kordonit umbilikal në lindje ka impakt domethënës te simptomat e ASD-së te fëmijët dhe gjithashtu kishin lidhje edhe me mosfunksionim normal të përshtatjes së fëmijës në jetën normale”, ka thënë në një deklaratë autori i studimit Hideo Matsuzaki.
Ai thotë se këto gjetje sugjerojnë se dinamika e diHERTeE-së gjatë periudhës së zhvillimit të bebes në bark është e rëndësishme për trajektoren e zhvillimit të fëmijës pas lindjes.
Studiuesit zbuluan se niveli i lartë i diHERTeE-së kishte lidhje me vështirësitë në ndërveprimet sociale, ndërkohë që niveli i ulët i saj u gjet se ka lidhje me sjelljet kufizuese të fëmijëve. Ky korrelacion dukshëm u vu re më shumë te vajzat se sa te djemtë.
Mostrat nga kordoni umbilikal u morën menjëherë pas lindjes së fëmijëve dhe u ruajtën. Simptomat e ASD-së te këta fëmijë më pas u shoqëruan me të dhënat e fëmijëve kur u bën gjashtë vjeç, me ndihmën e nënave të tyre.
Duke shikuar rezultatet, studiuesit sugjeruan se matja e nivelit të diHERTeE-së në lindje mund të bëhet mjet me vlerë për të parashikuar rrezikun e fëmijës nga ASD-ja.
“Efekti i ndërhyrjes së hershme te fëmijët me ASD është mjaft i rëndësishëm dhe zbulimi i rrezikut që në lindje mund të rrit shanset për intervenim e mbështetje të hershme për fëmijët me ASD”, ka shtuar Matsuzaki.
Ai gjithashtu ka thënë se frenimi i metabolizmit të diHERTeE-së gjatë shtatzënësisë mund të jetë rrugëdalje premtuese për parandalimin e tipareve të ASD-së te fëmijët, ani pse në këtë fushë janë të nevojshme studime të mëtutjeshme.
Studimi që u publikua në revistën Psichiatry and Clinical Neurosciences, mbështetet në një studim paraprak në minj, i cili ka sugjeruar se PUFA dhe metabolitet e tij gjatë shtatzënësisë luanin rol kyç në zhvillimin e ASD-së.
“Ne dolëm në hipotezën se dinamikat e metaboliteve të acideve yndyrore CYP-PUFA përgjatë periudhës kur bebja gjendet në bark, mund të ketë ndikim në simptomat e ASD-së dhe vështirësitë në funksionimin e përditshëm te fëmijët pas lindjes”, tha ai.
Ekipi i studiuesve ka deklaruar se besojnë se këto gjetje hapin rrugë premtuese për zbulimin e mistereve të ASD-së, duke çuar në diagnostikim e hershëm dhe trajtim më të mirë./ NewsWeek/