Presidenti kolumbian Gustavo Petro nënshkroi një ligj që ndalon ndeshjet me dema në vend.
Petro e nënshkroi atë përpara qindra aktivistëve të të drejtave të kafshëve gjatë një ceremonie të mbajtur në një tribunë demash në Bogota, pasi një mbështetës i dorëzoi atij një kopje të ligjit.
“Ne nuk mund t’i themi botës se vrasja e qenieve të gjalla për argëtim është një kulturë. Kjo lloj kulture e vrasjes së kafshëve për qejf mund të na çojë edhe ne të vrasim njerëz për qejf, sepse edhe ne jemi kafshë”, tha Petro në një fjalim pas nënshkrimit të ligjit, raporton AP.
Ndalimi i ndeshjeve me dema u miratua nga Kongresi Kolumbian në maj, pas disa muajsh debati.
Ligji i bën thirrje qeverisë të ndalojë plotësisht ndeshjet me dema në të gjithë vendin deri në vitin 2027.
Lufta me dema është mbajtur në Kolumbi që nga koha e kolonializmit spanjoll. Të apasionuarit pas ndeshjeve me dema në Kolumbi argumentojnë se ndalimi shkel të drejtat e pakicave për të shprehur trashëgiminë e tyre kulturore dhe gjithashtu kërcënon jetesën e atyre që sigurojnë jetesën nga ndeshjet me dema, si matadorët, sponsorët e ngjarjeve dhe tregtarët.
Aktualisht, vetëm shtatë vende lejojnë ndeshjen me dema, Spanja, Franca, Portugalia, Meksika, Venezuela, Ekuador dhe Peru, megjithëse disa qeveri komunale dhe rajonale në ato vende kanë vendosur ndalime lokale./abcnews.al