Influencuesi i njohur, Andrew Tate, nuk do të jetë në gjendje të largohet nga Rumania ndërsa pret gjyqin për akuzat e trafikimit të qenieve njerëzore pasi një gjykatë rumune e apelit të martën përmbysi një vendim të mëparshëm.
Tate u padit në mesin e vitit 2023 së bashku me vëllanë e tij, Tristan dhe dy femra të dyshuara rumune për trafikim njerëzor, përdhunim dhe formim të një bande kriminale për shfrytëzim seksual të grave, akuza që ata i kanë mohuar.
Në prill të këtij viti, gjykata e Bukureshtit vendosi se gjyqi i tyre mund të fillonte, një vendim që Tate e apeloi.
Në pritje të një vendimi mbi apelin e tij, katër të dyshuarve iu ndalua të largoheshin nga Rumania.
Më parë këtë muaj, gjykata e Bukureshtit hoqi kufizimin, duke u dhënë të dyshuarve lirinë e lëvizjes brenda BE-së, një vendim që prokurorët kundërshtuan dhe Gjykata e Apelit e Bukureshtit e rrëzoi të martën.
Gjykata “pranon sfidën e paraqitur nga agjencia e ndjekjes së krimit të organizuar DIICOT”, thuhet në një deklaratë.
“Ajo hedh poshtë si të pabazuar kërkesën e të akuzuarit për të zëvendësuar detyrimin për të mos u larguar nga territori rumun me detyrimin për të mos dalë nga Bashkimi Evropian”.
Vëllezërit Tate, të dy ish-kikboksierë me shtetësi të dyfishtë amerikane dhe britanike, janë të dyshuarit e profilit më të lartë që përballen me gjyq për trafikim njerëzor në Rumani.