Ukraina ka marrë më shumë se 2 miliardë euro (2,2 miliardë dollarë) fonde nga Fondi Monetar Ndërkombëtar (FMN), tha sot kryeministri Denys Shmyhal në Telegram.
“Kësti është pjesë e një programi kredie në vazhdim që arrin në rreth 15 miliardë euro”, tha Shmyhal.
“Ai do të përdoret për të financuar shpenzimet jetike të qeverisë si shpenzimet e mirëqenies dhe pagat për punonjësit e shtetit, duke përfshirë mjekët dhe mësuesit”, tha ai.
“Që nga pushtimi i plotë i Ukrainës nga Rusia në shkurt 2022, Kievi ka marrë më shumë se 80 miliardë euro ndihmë nga partnerët e huaj për shpenzimet e tij qeveritare”, sipas shifrave ukrainase.
Revista britanike “The Economist” raportoi të dielën se vendi mund të përballet me një dështim të mundshëm në gusht, pasi një numër huadhënësish privatë pritet të kërkojnë një rifillim të shlyerjes së borxhit që u pezullua në fillim të konfliktit.
Qeveria ukrainase tha se nuk është në gjendje të fillojë shlyerjen e kredive dhe po synon të ngrijë pagesat e ardhshme ose të ristrukturojë borxhin e saj.
Aleatët ndërkombëtarë të Kievit kanë ngrirë tashmë shlyerjet e kredive të qeverisë deri të paktën në vitin 2027.
Sipas llogaritjeve të “The Economist”, barra e borxhit të Ukrainës pritet të rritet në rreth 94% të prodhimit të brendshëm bruto (PBB) deri në fund të vitit.
Në eurozonë, çdo shifër përtej 60% konsiderohet e paqëndrueshme.
