Kryebashkiaku i Caprit ka urdhëruar ndalimin e ardhjes së turistëve për shkak të një emergjence uji.
Paolo Falco tha se pa furnizim me ujë ishte e pamundur të garantoheshin shërbime esenciale për “mijëra njerëz” që udhëtojnë në ishull çdo ditë gjatë sezonit turistik, shkruan The Guardian, transmeton Gazeta Express.
“Situata shëndetësore dhe higjienike është shpërthyese, ne kemi marrë kundërmasat tona dhe kemi aktivizuar njësinë e krizës dhe kemi lëshuar një urdhër kufizues”, thuhet në deklaratën e kryetarit të bashkisë.
Urgjenca u shkaktua nga një dështim në sistemin e ujit të vendit që siguron furnizime jetike për ishullin.
Për momentin ka ende një furnizim me ujë në pjesën më të madhe të ishullit, por disa zona të izoluara të bashkisë së sipërme të Anacapri janë tashmë të thata. Rrjetin e furnizojnë vetëm rezervuarët lokalë, të cilët, në mungesë të furnizimeve nga shteti, mund të mbarojnë.
Ndërkohë, cisternat pritet të arrijnë në ishull për të ndihmuar shërbimet esenciale, në pritje të rivendosjes së furnizimit të plotë.
Urdhri i kryetarit të bashkisë u dha pak pas orës 9 të mëngjesit, duke shkaktuar ndalimin e menjëhershëm të shitjeve të biletave.
Vendimi ka krijuar radhë të gjata pasagjerësh në zyrat e biletave në portet e qytetit jugor të Napolit, pika e nisjes për shumicën e trageteve për në Capri.
