Analisti politik Arbnor Sadiku ka thënë se heqja e masave ndaj Kosovës do të jetë e ngadalshme dhe e kufizuar me lëvizjet e Kosovës për formimin e Asociacionit të komunave me shumicë serbe.
Në emisionin “60 Minuta” në KTV, Sadiku ka thënë të enjten se ka qenë e ditur që problematika e heqjes së masave nuk qëndron te forma dhe teknika, por përmbajtja.
“Për të gjithë njohësit e çështjeve të integrimeve, s’kemi pasur pritje që masat të hiqen menjëherë, për faktin se ndonëse kushtet formale Kosova i ka pranuar dhe implementuar rreth inkoorporimit të qytetarëve serbë në institucionet e Kosovës, në kuptimin de facto ajo s’ka ndodhur dhe Unioni Evropian për heqjen e këtyre masave është i kushtëzuar nga pesë vendet që s’e kanë njohur Kosovën dhe veçanërisht Serbia sepse e kanë ndërlidhur me pjesëmarrjen e qytetarëve serbë në institucionet e Kosovës me krijimin e Asociacionit të komunave me shumicë serbe. Deri të mos ketë lëvizje nga Kosova rreth krijimit të Asociacionit, edhe vendimi për masa do të jetë i ngadalshëm dhe i kufizuar me të”, ka thënë ai.
Ai ka vlerësuar se rekomandimi që Kosovës t’i hiqen masat gradualisht është sinjal që Kosova duhet të bëjë përparim në fuqizimin e serbëve në veri dhe që përmes marrëveshjeve politike të krijojë mundësi që serbët në veri të jenë pjesëmarrës në institucionet e Kosovës.
Ai ka thënë se Kosova ka gabuar me idenë që të zgjidhë çështjen e bojkotit të serbëve në veri përmes teknikaliteteve.
Ka akuzuar bashkësinë ndërkombëtare se po e lë Kosovën në faj kujdestar.
Si zgjidhje, Sadiku ka thënë se Kosova duhet t’i shohë punët e veta e të mos merret me Serbinë. “Nëse ne kemi thënë në Bruksel se pranojmë të krijohet Asociacioni, atëherë ai do të krijohet”, ka thënë ai.
“Edhe ambasadori Hill e tha se palët janë të obliguara të njohin dokumentet e njëra-tjetrës, por jo njohjen e ndërsjellë në fazën aktuale. S’duhet të kërkojmë diçka që s’është e shkruar dhe që më shumë u tingëllon ëndrrave të mira sesa që mund të bëhen realitet duke njohur këtë Serbi përballë dhe një president që s’dallon asgjë nga politika e Millosheviqit, madje po e vazhdon vetëm me mjete tjera”, ka thënë tutje Sadiku.
Sipas tij, takimi i ftuar për javën e ardhshme në mes të kryeministrit Albin Kurti dhe presidentit të Serbisë, Aleksandar Vuçiq, do të jetë vetëm kurtuazie për të dhenë sinjale të vazhdimit të dialogut. Këtë e ka ndërlidhur me faktin se ndërmjetësve sivjet u përfundon mandati.
Ai ka shtuar se pret që qeveria aktuale ta shfrytëzojë situatën në veri për çështje elektorale. /KOHA