Gerald Knaus, nga Iniciativa Evropiane për Stabilitet sot në ditën kur do të mblidhet Komiteti i Ministrave të Këshillit të Evropës tha se do të ishte fatale për ministrat e jashtëm të shteteve anëtare të injoronin formulën e Martti Ahtisaarit për paqen dhe rekomandimin e Asamblesë Parlamentare, ku me 83 për qind të votave u rekomandua anëtarësimi i Kosovës në këtë institucion.
Knaus në një postim në X shkruan po ashtu se fatale do të ishte edhe po të injorohej një propozim shumë i mirë nga Qeveria e Kosovës për të trajtuar me mirëbesim dhe mbi bazën e një propozimi të fortë një çështje përfundimtare, të pazgjidhur prej kohësh.
“Dhe për të përfunduar në vend të kësaj: Serbia mund të vërë veton ndaj përparimit të Kosovës. Duhet të pajtohet me atë si do të krijohet Asociacioni i komunave me shumicë serbe, por të cilën nuk do ta bëjë”, shkruan Knaus.
Drejtori i Iniciativës Evropiane për Stabilitet po ashtu në një postim tjetër në platformën X shkruan se ministrat e Jashtëm në Strasburg duhet të caktojnë një datë të re për një takim të jashtëzakonshëm brenda disa javësh, në mënyrë që të mund të votojnë aplikacionin e Kosovës pasi të ketë ecur përpara me çështjen e Asociacionit.
“Kjo do t’i dërgonte një sinjal të qartë Serbisë se shtetësia e Kosovës është këtu për të qëndruar dhe gëzon mbështetjen e plotë të demokracive evropiane”, shkruan Knaus.
Ai tutje thotë se Martti Ahtisaari me siguri do të kishte qenë shumë i kënaqur ta shihte Kosovën në Këshillin e Evropës këtë vit.
“Dhe të shpresojmë se ky brez diplomatësh nuk do të shkatërrojë atë që ndërtoi një brez i mëparshëm”, thotë Knaus.