“Nëse ata dështojnë, apo nëse vazhdojnë të dështojnë në zbatimin e asaj për çfarë janë pajtuar, kjo do të ketë pasoja serioze. Këto pasoja janë të lidhura me integrimin e tyre në BE”, tha Stano.
Në pyetjet e përsëritura se pse BE-ja nuk deklarohet nëse Serbia, me veprimet e saj kundër anëtarësimit të Kosovës në Këshillin e Evropës, po e shkel marrëveshjen, Stano përsëriti se “Këshilli i Evropës është një organizatë e ndryshme nga BE-ja”.
Edhe në pyetjen se a e marrin seriozisht kërcënimin e Serbisë se do të largohet nga Këshilli i Evropës në rast se Kosova bëhet anëtare, ky zëdhënës i BE-së ka përsëritur se nuk i takon BE-së të komentojë për këtë çështje.
“Këshilli i Evropës është një organizatë krejtësisht e ndryshme nga Bashkimi Evropian. Pra, kjo nuk duhet të ngatërrohet. Nëse një vend vendosë të nisë diskutimet për t’u larguar nga anëtarësia në Këshillin e Evropës apo të modifikojë anëtarësinë, kjo vërtetë nuk është diçka që i takon Bashkimit Evropian të komentojë”, u shpreh Stano.
Ai shtoi se, megjithatë, Këshilli i Evropës është një organizatë shumë e rëndësishme për demokraci dhe mbrojtjen e të drejtave të njeriut.
Kosova synon të anëtarësohet në Këshillin e Evropës në muajt në vijim, pasi javën e kaluar, Komiteti për Politikë dhe Demokraci i kësaj organizate e miratoi raportin e raportueses për Kosovën, Dora Bakoyannis, i cili rekomandoi se ajo i ka plotësuar kushtet për t’u bërë anëtare e plotë e Këshillit të Evropës.
Asambleja Parlamentare pritet të votojë për anëtarësimin e Kosovës në prill, dhe nëse ajo jep dritën jeshile, atëherë fjalën përfundimtare duhet ta japë Këshilli i Ministrave të Këshillit të Evropës në maj. /REL/
