Shefi i deputetëve të Partisë Demokratike të Kosovës, Abelard Tahiri, ka deklaruar se nuk do t’i votojnë marrëveshjet ndërkombëtare me qëllimin e vetëm pengimin e mazhorancës dhe të dërgohet vendi në zgjedhje të jashtëzakonshme.
Ai tha se kjo qeveri nuk e meriton të qeverisë marrë parasysh që vendi është ende nën sanksione dhe i qortuar nga ShBA. Bojkoti i PDK-së, tha Tahiri se do të vazhdojë edhe në të ardhmen.
“Ju e dini që tash e një periudhë apo më mirë nga qershori i viti të kaluar GP i PDK nuk e voton as një marrëveshje ndërkombëtare. Nuk e ka votuar asnjë ligj në kuadër të Kuvendit me qëllimin e vetëm që të mos krijojmë kushte që të punohet më tutje dhe vendi të shkojë në zgjedhje të jashtëzakonshme. Ju e shihni që tashmë nuk ka kuptim që të ja bëjmë kuorumin dhe të votojmë marrëveshje ndërkombëtare kur vendi ynë është nën sanksione”, u shpreh Tahiri.
Ai tha se shkuarja në zgjedhje të jashtëzakonshme është e domosdoshme, marrë parasysh sanksionet ndërkombëtare. Ai tha se Kosovës i nevojitet Qeveri e re “në mënyrë që ta nxjerrim vendin nga ky izolim”.
“Kur jemi nën kërcënim të vazhdueshëm për një suspendim të partneritetit me SHBA, çfarë kuptimi ka kur ne ndërkombëtarisht po izolohemi dhe të vazhdojmë të sillemi se gjithçka është normale këtu dhe t’i votojmë marrëveshjet ndërkombëtare. Në çdo veprim, çdo përpjekje e jona që e bëjmë në Kuvendin e Kosovës është që ta çojmë vendin në zgjedhje të jashtëzakonshme në mënyrë që ta nxjerrim nga izolimi ndërkombëtar dhe nga sanksionet ndërkombëtare. Vendit i duhet një kryeministër i ri, një qeveri e re dhe pa dyshim që do të vijë nga PDK-ja në mënyrë që ta nxjerrim vendin nga ky izolim dhe të japim një zhvillim”, u shpreh ai.
/TV Arbëria