Banorët e Graçanicës thonë se janë të shqetësuar pas deklaratave të Presidentit të Serbisë për “heqjen” e dinarit në Kosovë. Ndaj kësaj deklarate të enjten ka reaguar Zëvendëskryeministri Besnik Bislimi i cili ka thënë se dinari nuk është përmendur fare në rregulloren e Bankës Qendrore pasi s’ka qenë i lejuar asnjëherë.
Bislimi ka thënë se paratë nga Serbia deri tash kanë ardhur në thasë dhe në vetura private.
“Insistimi qё edhe mё tej, transferi i parave pёrtej kufirit shtetёror tё bёhet dhe tolerohet nё mёnyrё klandestine, me thasё e vetura individuale, e pastaj tё shpёrndahet pёrmes zyreve tё paregjistruara e të palicensuara, jo vetёm qё ngjason nё ide tё shekullit të 19-të, por edhe synon mbajtjen e qytetarёve pёrfitues nё ilegalitet dhe varёsi konstante nga tё njëjtёt sekserё” ka theksuar ai.
Por sipas mediumit RTV Kim qytetarët në Gracanicë janë të zhgënjyer edhe “pse e kanë ditur se kjo do të ndodhë”
Qytetarët serbë thanë se janë të shqetësuar që përveç bankës tani do të pushojë së punuari edhe posta.
RTV kim shkruan se njoftimi për ndërprerjen e transaksioneve të pagesave me Serbinë u dha në fund të vitit të kaluar, kur punonjësit dhe përdoruesit e shërbimeve të “Komercijalna Banka” në Kosovë u njoftuan për mbylljen e saj më 31 janar të këtij viti.
“Jam i zhgënjyer, ja çfarë po ndodh… E patë, së pari e anuluan Bankën Komerciale, gjakun e popullit serb këtu në pjesën qendrore të Kosovës, tani është radha e Postës, Zoti e di se si do të zhvillohen gjërat. Nuk e dimë, do të shohim si të gjithë… Gjëja më e keqe e gjithë kësaj është se ne dukemi sikur nuk po na ndodh neve, sikur po ndodh diku tjetër. Pra, me siguri, rreth dyzet veta nga Komercijalna banka do të humbasin punën e tyre, disa do të marrin pagesën e largimit, disa do të shkojnë të punojnë në Serbi, prandaj ne po dëbojmë familjet. Ai që ka punuar në Komercijalna Bank do të shkojë në Serbi. Kështu do të jetë edhe me postën”, tha për RTV Kim Nebojsha Simiq nga Graçanica.
Qytetarët, paratë e të cilëve ishin depozituar në “Komercijalna Banka”, u detyruan të transferohen në “Poštanska štedionica”.
“Si do t’i marrin pensionet pensionistët? Këta janë ata që janë më të cenuarit dhe pensionet i marrin postierët në adresat e tyre, por tani për tani përfaqësuesit politikë të serbëve ende heshtin, mendoj se duhet të dalin dhe t’i shpjegojnë popullit se çfarë po ndodh”, thotë Sasha Sekuliq, biznesmen nga Graçanica.
Serbët nga Graçanica “shpresojnë edhe te zyrtarët në Bruksel”.
Qytetarët janë inkurajuar nga deklarata e ndërmjetësit në dialogun Beograd-Prishtinë, Miroslav Lajçak, se beson se do të gjendet një zgjidhje që nuk do të ketë pasoja.
“Nuk është se jam i befasuar, nuk ka asgjë që mund të na befasojë më shumë. Ndoshta e prisnim, por jo në një periudhë kaq të shpejtë. Në njëfarë mënyre, disa institucione, d.m.th punëtorët në institucione të caktuara, sugjeruan që fillimisht të ndryshojmë llogarinë, të transferojmë nga Komercijalna banka në disa banka të tjera, Poštanska štedionica, dhe tani që jemi integruar në Poštanska štedionica, kemi një situatë ku dinari është shfuqizuar dhe ne e dimë se posta funksionon vetëm falë atij dinari”, thotë Milena Zdravkoviq, e cila punon në Galerinë e Arteve të Prishtinës në Graçanicë./Express/